Dünýä belli Chupa Chups brendi açylmasy diýseň kyn bolan, täsin we adaty bolmadyk üýtgeşik süýjini hödürledi. Bu taslama brendiň täze we has aňsat açylýan gaplamasynyň mahabat kampaniýasynyň bir bölegi boldy. Ters düşünje arkaly amala aşyrylan bu taslama, adaty süýjiniň daşyny açmagyň hem nähili «kyn» bolup biljekdigini görkezmek üçin döredildi.
Creative Review neşiriniň habar bermegine görä, bu synag önümine «Chupa Chups Impossible» («Mümkin däl Chupa Chups») diýlip at berildi. Onuň gaplamasy häzirki zaman tehnologiýalarynda ýörgünli ulanylýan uglerod kompozitinden, kremniý karbidinden, aramid süýümleriniň hem-de suwuk rezin gatlagyndan ybaratdyr.
Kompaniýa bu gaplamanyň hatda ýiti byçga, oda we gidrawlik pressiň äpgirt güýjüne hem durnuklydygyny tassyklaýar.
Geň süýjiler çäkli mukdarda öndürilip, höwesjeň blogerlere iberildi we olara gaplamany açmaga synanyşmak hem-de bu tejribäni köpçülige ýetirmek teklip edildi.
Mahabat kampaniýasyny döreden BBH London agentliginiň hünärmenleri täsin taslama hakda: «Bu bimany görünýän, emma iňňän oýlanyşykly edilen işleriň biridir. Munuň üsti bilen, käwagt iň dogry jogaby edilmeli zady tep-tersine etmek arkaly hem tapyp bolýandygyny görmek bolýar» diýip belleýärler.
