Şotlandiýada 55 sany läheň (kit) özüni kenara urdy. Independent neşiriniň habar bermegine görä, 6-njy mart güni irden bir kişi Treýg-Mor kenaryndaky äpet jandarlary görüp, bu barada polisiýa habar ýetiripdir. Wakanyň bolan ýerine Britaniýanyň deňiz haýwanlaryny halas ediş gullugynyň hünärmenleri geldiler. Olar jemi 55 läheňi hasaba aldylar. Şol wagt olaryň diňe 15-si diri halda ekeni.
Halas ediş çäresini amala aşyrmak örän kyn boldy. Wakanyň bolan ýeri uzakda ýerleşýändigi sebäpli aragatnaşyk ulgamy ýok diýen ýalydy. Şeýle-de, harasatly howa we kenardaky şertler hem işleri has-da kynlaşdyrdy. Netijede, hünärmenler diňe ýekeje kiti deňze gaýtaryp bildiler.
Ilki alymlar bu köpçülikleýin hadysany haýwanlaryň keseli ýa-da suw aşagyndaky güýçli sesler bilen baglanyşdyrdylar. Emma barlaglar läheňleriň aslynda sagdyn ýagdaýda bolandyklaryny görkezdi. Soňra bilermenler kenara zyňylmazdan az salym öň ene läheňleriň biriniň uzak we örän agyr dogrumy geçirendigini anykladylar.
«Grinda läheňleriniň jemgyýetçilik baglanyşygy örän güýçli boýlar. Şol sebäpden, ähtimal, tutuş süri kyn ýagdaýa düşen ene läheňiň yzy bilen suwuň ýalpak ýerine gaýdan bolarly» diýip, hünärmenler belleýär.
