Türkmenistanyň Prezidenti Serdar Berdimuhamedow 6-njy martda Aksoltan Toreýewna Ataýewany Türkmenistanyň Birleşen Milletler Guramasynyň (ştab-kwartirasy ABŞ-nyň Nýu-Ýork şäherinde ýerleşýär) ýanyndaky hemişelik wekili wezipesinden boşatmak hakyndaky Permana gol çekdi. Bu barada TDH döwlet habarlar agentligi habar berdi.
Döwlet Baştutany degişli Permany bilen ony birnäçe beýleki diplomatik wezipelerinden hem boşatdy. Ataýewa BMG-niň ýanyndaky hemişelik wekil wezipesinden başga-da, Türkmenistanyň Kuba Respublikasyndaky, Braziliýa Federatiw Respublikasyndaky we Wenesuela Boliwarian Respublikasyndaky ilçisi wezipelerini hem eýeleýärdi. Permanda bu kararyň başga işe geçmegi sebäpli kabul edilendigi bellenilýär.
Türkmenistanyň Gahrymany Aksoltan Ataýewa ýurduň diplomatiýasynyň weteranydyr. Ol 1994-nji ýylyň ýanwar aýyndan bäri Türkmenistanyň Nýu-Ýorkdaky BMG-niň ýanyndaky Hemişelik wekilhanasyna yzygiderli ýolbaşçylyk edip geldi. Gulluk eden ýyllarynyň dowamynda ol, hususan-da, 2023-nji ýylda «Türkmenistanyň ussat diplomaty» diýen tapawutlandyryş nyşanyna mynasyp boldy, 2024-nji ýylyň dekabrynda bolsa Magtymguly adyndaky Halkara baýragynyň eýesi boldy.
