Lexus kompaniýasy Hytaý bazarynda ES sedanynyň «Moon Shadow» (Aý şuglasy) diýlip atlandyrylýan ýörite görnüşini tanyşdyrdy. Bu model, ilkinji nobatda, iki reňkdäki kuzowy bilen tapawutlanýar. Bu wersiýanyň çykarylmagy sedanyň häzirki nesliniň satuwynyň tamamlanmagy bilen baglanyşykly diýlip çaklanylýar.
Awtoulagyň kuzowynyň ýokarky bölegi kümüşsöw, aşaky bölegi bolsa goýy reňkde ýerine ýetirildi. Dizaýnerler beýle reňkleri gijeki deňziň ýüzündäki Aý şöhlesiniň öwüşgininden alypdyrlar. Ulagyň daşky görnüşini garaldylan radiator gözenegi we iki reňkli 18 dýuýmlyk tekerler has-da özüne çekiji edýär. Tehniki tarapdan awtoulagyň aýratynlyklary üýtgewsiz galdy, diňe töweregi doly görkezýän (360 graduslyk) kameralar goşuldy.
Bu ýörite görnüş 173 at güýjüne eýe bolan iki litrlik hereketlendiriji we wariator bilen enjamlaşdyrylan ES 200 modifikasiýasyna esaslanýar.
Lexus ES Moon Shadow-nyň bahasy 307 800 ýuana (takmynan 44,6 müň dollar) barabardyr. Bu bolsa adaty ES 200 Premium görnüşinden 8 müň ýuan gymmat bolsa-da, modeliniň iň ýokary toplumyndan ep-esli arzan diýmekdir. Lexus ES-iň täze, sekizinji nesliniň dünýä bazaryndaky satuwlaryna ýakyn aýlarda garaşylýar. Täze nesil täzelenen dizaýny, uly ölçegleri we diňe gibrid ýa-da elektromobil görnüşinde hödürlenjek hereketlendiriji hatary bilen tapawutlanar.
