Mitsubishi kompaniýasy Nissan bilen bilelikde işlenip düzüljek täze model arkaly pikaplarynyň hataryny giňeltmegi meýilleşdirýär. Täze önüm ilkinji nobatda ABŞ-nyň bazaryna gönükdiriler.
"Mitsubishi-niň" ýolbaşçysy Takao Katonyň habar bermegine görä, modele şu onýyllygyň ahyrlaryna golaý garaşmaly. Deslapky maglumatlara görä, onuň esasyny 2028-nji ýylda tanyşdyrylmagyna garaşylýan indiki nesil "Nissan Frontier" düzer.
Pikapyň önümçiliginiň "Nissan-nyň" demirgazyk amerikan zawodynda guraljakdygy çaklanylýar. Iki modeliň hem bir önümçilik hatarynda çykarylmagy ähtimal.
CarBuzz neşiriniň ýazmagyna görä, orta ölçegli pikaplar ABŞ-nyň bazarynda ýyllyk möçberi 600 müň awtoulaga ýetýän islegli segment bolmagynda galýar. Şol bir wagtyň özünde, täze "Mitsubishi" modeli "Toyota Tacoma" we "Ford Ranger" ýaly awtoulaglar bilen bäsleşmeli bolar.
Ýakynda häzirki "L200" pikapynyň täze nesil "Mitsubishi Pajero" wnedorožnigi (ýolsuz ýerlerde ýöreýän ulagy) üçin esas boljakdygy mälim boldy. Kompaniýa eýýäm modeliň yzyna dolanjakdygyny tassyklady, ilkinji tizerini çap etdi we tanyşdyrylyşynyň güýz aýyna meýilleşdirilendigini habar berdi.
