Mitsubishi kompaniýasy "Pajero" ýolsuz ýerden ýöreýän ulagynyň (wnedorožniginiň) gaýdyp gelýändigini resmi taýdan tassyklady. Täze, bäşinji nesil modeliň tanyşdyrylyş dabarasy şu ýylyň güýzünde bolar.
Täze wnedorožnigi öndürmek meýilnamalary barada entek ýylyň başynda, kompaniýanyň ralli ýaryşyna gatnaşmagyna bagyşlanan wideoroligiň çap edilmeginden soň belli bolupdy. Indi öndüriji täze ramaly "Pajero-ny" tanyşdyrmaga taýýarlanýandygyny habar berdi.
Modeliň birinji nesli 1982-nji ýylda bazara çykaryldy. Dördünji nesil 2006-njy ýyldan 2021-nji ýyla çenli öndürildi, aýry-aýry bazarlarda bolsa awtoulag "Montero" we "Shogun" atlary bilen satyldy.
"Mitsubishi-de" täze "Pajero-nyň" "Triton/L200" pikapynyň berk ramaly gurluşyny aljakdygyny habar berdiler. Ýolagçy wersiýasy üçin asma ulgamy ýörite sazlanar. Kompaniýa geljekki wnedorožnigi brendiň täze flagmany diýip hem atlandyrdy.
Öndüriji modeliň ilkinji tizerini (gysga mahabatlandyryşyny) çap etdi. Suratda öňki yşyklandyryş ulgamlarynyň wertikal bloklarynyň giň, ýanyp duran zolak bilen birleşdirilendigi görünýär.
Tehniki häsiýetnamalary entek mälim edilmedi. Bazara baglylykda, "Triton" pikapy 204 at güýjüne eýe bolan 2,4 litrlik bi-turbo dizel hereketlendirijisi, 150 ýa-da 184 at güýjündäki turbo-dizeller, şeýle hem 128 at güýjündäki 2,4 litrlik benzin hereketlendirijisi bilen üpjün edilýär. Model mehaniki ýa-da awtomatiki geçiriji gutusy, yzky ýa-da doly geçirijili ulgam bilen elýeterlidir.
Täze "Pajero-nyň" gibrid hereketlendiriji ulgamyny almagy hem ähtimal. Wnedorožnik baradaky jikme-jik maglumatlar soňrak mälim ediler.
