Täze barlag çagalaryň ýedi ýaşyndaka ylym, tehnologiýa, inženerçilik we matematika bilen baglanyşykly kärleri saýlamagyň ähtimallygy baradaky stereotipleri özleşdirip başlaýandygyny görkezdi. Bu garaýyşlar olaryň geljekde kär saýlamagyna täsir edip biler.
Bu barada Journal of Experimental Child Psychology-de çap edilen ylmy makalada aýdylýar.
Alberta uniwersitetiniň psihology Ketrin Luken Raz we onuň topary dürli jynsly hem-de etniki gelip çykyşly 7 ýaşdan 12 ýaşa çenli 842 çagadan sorag etdiler. Çagalardan deň-duşlarynyň takyk ylym ugurlary bilen baglanyşykly kärleri saýlamagynyň ähtimallygy barada soraldy.
Barlagda çagalaryň köpüsiniň gyzlaryň köplenç alym däl-de, lukman bolmagynyň mümkindigine ynanýandygy anyklanyldy. Şeýle-de bolsa, gyzlaryň, oglanlara garanda, öz deň-duş joralarynyň ylym bilen bagly kärleri saýlap biljekdigine ynanýandygy anyklandy.
Öňki barlaglar hem ylym we tehnologiýa derslerine bolan gyzyklanmanyň başlangyç synplarda, esasanam sosial taýdan kynçylyk çekýän toparlaryň okuwçylarynyň arasynda pese gaçýandygyny görkezdi. Munuň bir sebäbi standartlaşdyrylan synaglaryň ýygy-ýygydan ulanylmagy bolup biler, bu bolsa mugallymlara çagalaryň gyzyklanmasyny has döredijilikli usullar arkaly saklamagy kynlaşdyrýar.
Barlagçylaryň gelen netijesine görä, çagalar ýedi ýa-da sekiz ýaşlarynda şeýle stereotipler we olaryň geljegine nähili täsir edip biljekdigi barada pikirlenip başlaýarlar.
