NASA agentligi Aý maksatnamasynyň ikinji tapgyry bolan «Artemis II» missiýasyny 1-nji aprelde amala aşyrmagy meýilleşdirýär. Bu möhlet fewral aýynyň ikinji ýarymynda ýüze çykarylan tehniki bökdençlik sebäpli yza süýşürildi.
Taýýarlyk işleri wagtynda hünärmenler SLS raketasynyň aralyk basgançagynda geliý gazyny geçiriş ulgamynda näsazlygy anykladylar. Şol sebäpli, raketa «Orion» kosmos gämisi bilen bilelikde uçuş meýdançasyndan aýryldy. Mart aýynda uçuş üçin amatly bolan iki sany wagt aralygy 11-nji marta çenli ýapylýandygy sebäpli, agentlik indiki mümkinçiligi 1-nji aprel hökmünde kesgitledi.
PCMag we Ars Technica neşirleriniň maglumatyna görä, uçurylyşdan öň SLS raketasy we «Orion» gämisi taýýarlyk işlerini dowam etdirmek üçin gaýtadan uçuş meýdançasyna getiriler. Näsazlygyň esasy sebäbi turba geçirijisiniň birikdirilen ýerindäki dykyzlandyryjy gatlakda dörän zeper bilen baglanyşyklydyr. Inženerler abatlaýyş işlerinden soň geliý gazyny pes tizlikde barlag üçin goýberdiler we häzirki wagtda goşmaça barlaglary dowam etdirýärler.
«Artemis» maksatnamasynyň birinji tapgyry 2022-nji ýylda amala aşyrylypdy: şonda «Orion» gämisi ekipažsyz Aýyň daşyndan aýlanyp, Ýere gaýdyp gelipdi. «Artemis II» missiýasynda bolsa Aýa üçüsi ABŞ-dan we biri Kanadadan bolan dört sany kosmonawt iberiler. Gämi Ýeriň hemrasynyň daşyndan aýlanar we takmynan on günden soň ekipažy yzyna getirer. Eger uçurylyş 1-nji aprelde hem başa barmasa, indiki mümkin bolan seneler hökmünde 3-nji aprel bilen 6-njy aprel aralygy görkezilýär.
