Türkmenistanyň DIM-inde BMG-niň Adam hukuklary boýunça sebitleýin wekili bilen duşuşyk geçirildi

2026-njy ýylyň 4-nji martynda Türkmenistanyň Daşary işler ministriniň orunbasary Mähri Bäşimowa bilen BMG-niň Adam hukuklary boýunça Ýokary komissarynyň müdirliginiň Merkezi Aziýa üçin sebitleýin wekili Matilda Bogneriň arasynda gepleşikler geçirildi. Bu barada daşary syýasat edarasynyň metbugat gullugy habar berýär.
Duşuşykda Türkmenistanyň özara hormat goýmaga we ösüşiň milli aýratynlyklarynyň göz öňünde tutulmagyna esaslanýan adam hukuklary boýunça konstruktiw dialogy ösdürmäge taýýardygy nygtaldy.
Söhbetdeşligiň barşynda BMG bilen 2026–2030-njy ýyllar üçin hyzmatdaşlygyň Çarçuwaly maksatnamasynyň durmuşa geçirilmegine, şol sanda gender deňligi we kanunçylygyň hökmürowanlygy ýaly ugurlara aýratyn üns berildi.
Taraplar pudagara toparynyň hukuk goraýyş syýasatyny utgaşdyrmakdaky ornuny belläp, BMG-niň Türkmenistandaky toparynyň düzüminde halkara bilermeniň Adam hukuklary boýunça geňeşçi wezipesine bellenilmeginiň bilelikdäki başlangyçlar üçin möhüm ädimdigini tassyklady.
Duşuşygyň ahyrynda Türkmenistan bilen BMG-niň Adam hukuklary boýunça Ýokary komissarynyň müdirliginiň arasyndaky hyzmatdaşlygy mundan beýläk-de çuňlaşdyrmaga gyzyklanma bildirildi.