Amerikanyň SpaceX kompaniýasy 2027-nji ýylyň ortalaryna çenli kämilleşdirilen Starlink internet hemralaryny orbita çykarmak üçin täze Starship göteriji raketasyny taýýarlamagy meýilleşdirýär. Bu barada «Financial Times» neşiri kompaniýanyň Starlink boýunça uly wise-prezidenti Maýkl Nikollsa salgylanyp habar berýär.
Häzirki wagta çenli SpaceX kompaniýasy Starship raketasynyň 11 synag uçuşyny geçirdi. Kompaniýanyň prezidenti Gwinn Şotwelliň aýtmagyna görä, indiki, ýagny 12-nji uçuş ýakyn dört-alty hepdäniň içinde amala aşyrylyp bilner.
Mundan öňki uçuş oktýabr aýynda bolupdy. Ol bir sagatdan gowrak dowam etdi we üstünlikli tamamlandy.
Starship raketasynyň doly derejede köp gezeklik bolmagyna we orbita 250 tonna çenli peýdaly ýüki çykaryp bilmegine garaşylýar. Uçuşlaryň bahasy boýunça ol häzirki wagtda ulanylýan Falcon raketalaryna garanyňda has bähbitli bolup biler.
Raketanyň işlenip düzülmegi Ilon Maskyň NASA bilen hyzmatdaşlygy giňeltmek hem-de geljekde Aýa we Marsa uçuşlary amala aşyrmak baradaky meýilnamalary üçin uly ähmiýete eýedir.
«Soňky wagtlar Ilon Aý barada köp agzady, ýöne onuň hakyky niýeti — Marsdyr. Geliň, olary deň derejeli ileri tutulýan ugurlar diýip atlandyralyň» – diýip, Şotwell Barselonadaky «Mobile World Congress» sergisinde belledi.
Starship raketasynyň täjirçilik debýutyna maýadarlar tarapyndan uly üns berilmegine garaşylýar. Şu ýyl SpaceX IPO-ny (paýnamalaryň ilkinji gezek köpçülige hödürlenmegi) geçirmegi göz öňünde tutýar, şunda kompaniýanyň bahasy 1,5 trillion dollar diýlip bahalandyrylyp bilner.
