Barselonada düýbi tutulanyna 144 ýyl geçen Sagrada Familiýa ybadathanasynyň merkezi diňiniň gurluşygy tamamlandy. Polatdan we aýnadan ýasalan 17 metrlik dört gyraňly haçyň iň ýokarky böleginiň gurnalmagy netijesinde gurluşygyň soňky tapgyry jemlendi. Şeýlelikde binanyň beýikligi 172,5 metre ýetdi.
Isa pygamberiň hormatyna dikeldilen merkezi diň ybadathananyň iň beýik nokady boldy. Sagrada Familiýa hut şonuň üsti bilen Germaniýadaky Ulm buthanasyndan öňürdip, dünýäniň iň beýik ybadathanasy derejesine eýe boldy.
Merkezi diňiň bitmegi esasy binanyň gurluşygynda jemleýji tapgyra geçilendigini aňladýar. Bu işleri arhitektor Antonio Gaudiniň aradan çykan gününiň 100 ýyllygy mynasybetli şu ýyl doly tamamlamak meýilleşdirilýär. Şol bir wagtda, ybadathananyň «Şöhrat» diýlip atlandyrylýan beýik fasadynyň gurluşygynyň ýene takmynan on ýyl dowam etjekdigi çaklanylýar.
Bu ähmiýetli waka Barselonanyň ÝUNESKO tarapyndan 2026-njy ýylyň Bütindünýä binagärlik paýtagty diýlip yglan edilmegi bilen gabat geldi. Merkezi diňiň gurluşygynyň tamamlanmagyna bagyşlanan resmi dabarany 10-njy iýunda Barselonada geçirmek göz öňünde tutulýar.
