Guardian neşiriniň habar bermegine görä, Meksikanyň 400-e golaý sungat işgäri hökümete açyk hat ýollap, Frida Kalonyň eserleriniň Ispaniýa iberilmeginiň şertlerini aýdyňlaşdyrmagy talap etdi. Medeni jemgyýetçiligiň wekilleri bu milli gymmatlyklar ýurtdan çykarylandan soň, yzyna gaýdyp gelmez öýdüp gaty gorkýarlar.
Galmagal XX asyr Meksika sungatynyň iň ähmiýetli ýygyndylarynyň biri bolan Gelmanlaryň kolleksiýasynyň üstünde turdy. Bu ýygyndyda Frida Kalonyň, Diego Riweranyň, Rufino Tamaýonyň, Hose Klemente Oroskonyň we beýleki görnükli ussatlaryň 160-dan gowrak eseri bar.
2023-nji ýylda bu kolleksiýany Sambrano maşgalasy satyn aldy we onuň ygtyýaryny Ispaniýanyň Banco Santander toparyna berdi. Bank bolsa şu tomusda sergini Ispaniýadaky Faro Santander medeniýet merkezinde goýmak isleýär.
Medeniýet merkeziniň direktory Daniel Weganyň El País neşirine beren interwýusynda kolleksiýanyň täze merkezde «hemişelik görkeziljekdigini» ýaňzytmagy meksikanlaryň gorkusyny has-da artdyrdy. Hakykatdan hem, bu boluş eserleriň Meksika hiç wagt gaýtarylyp getirilmän, Ispaniýada galdyryljakdygyna meňzeýär.
Açyk hatyň awtorlarynyň biri, taryhçy Fransisko Berzunsa: «Kalo biziň taryhymyzyň iň görnükli suratkeş zenany hem bolsa, onuň eserlerini Meksikanyň özünde däl-de, daşary ýurtlarda görmek has aňsat» diýip, ýagdaýyň näderejede ýürek awadyjydygyny düşündirýär.
