Apple kompaniýasy täzelenen MacBook Air we Pro modellerini, şeýle hem iki sany täze monitory hödürledi.
MacBook Air modeli M5 çibi, ulaldylan ýat we 18 sagada çenli zarýadsyz işlemek mümkinçiligi bilen üpjün edildi. Täze prosessor emeli aň bilen bagly wezipeleri öňküden dört esse çalt ýerine ýetirýär.
Noutbugyň 13,6 we 15,3 dýuýmlyk iki sany displeýi bar, ýagtylygy 500 nit. 512 GB SSD ýadyny 4 TB çenli ulaltmak mümkin. Gurluşlar 12 Mp kamera we Wi-Fi 7 hem-de Bluetooth 6 goldawy bolan N1 çibi bilen enjamlaşdyryldy. 13 dýuýmlyk wersiýasynyň bahasy — 1099 dollar, has uly displeýli noutbugyň bahasy bolsa 1299 dollar.
MacBook Pro modeli M5 Pro we M5 Max çipleri bilen işleýär. Prosessorlaryň 18 sany CPU ýadrosy we 40-a çenli grafiki ýadrosy bar. M5 Pro öňki model bilen deňeşdirilende öndürijiligi 30% ýokarlandyrýar, M5 Max bolsa 3D animasiýa, goşundylar we emeli aň wezipeleri üçin has laýyk gelýär.
14 we 16 dýuýmlyk Liquid Retina XDR displeýleriniň HDR režimindäki ýagtylygy 1600 nite çenli ýetýär. SSD ýadynyň tizligi iki esse artdyryldy. M5 Pro-ly noutbugyň başlangyç ýady 1 TB, M5 Max çipli modeliňki bolsa 2 TB möçberindedir.
14 dýuýmlyk displeýli M5 Pro-nyň bahasy 2199 dollar, M5 Max-yňky bolsa 3599 dollar boldy. 16 dýuýmlyk ekrana eýe bolan noutbuklaryň bahasy bolsa 2699 we 3899 dollara deňdir.
Şeýle-de, Apple 5K durulygy we ýokary ýagtylygy bolan 27 dýuýmlyk Studio Display we Studio Display XDR monitorlaryny hödürledi. Adaty Studio Display-iň bahasy 1599 dollar, Studio Display XDR-iň bahasy bolsa 3299 dollar boldy.
Bularyň ählisi 11-nji martda satuwa çykar.
