Ý.A.Gagarin adyndaky Kosmonawtlary taýýarlamak merkezi «Roskosmosyň» kosmonawty, Türkmenistanyň gahrymany Oleg Kononenkonyň «Soýuz MS-31» gämisiniň serkerdesi edilip bellenilendigini habar berdi. Onuň baştutanlygyndaky uçuş HKS-77 (Halkara kosmos stansiýasy) ekspedisiýasynyň çäklerinde amala aşyrylar.
Bu Türkmenistanly kosmonawtyň karýerasynda eýýäm altynjy uçuş bolar.
Ekipažyň bortinženeri bolup Aleksandr Grebýonkin bellenildi.
Oleg Kononenko «Roskosmosyň» häzirki wagtda işleýän kosmonawtlarynyň arasynda iň tejribelisidir. Ol 2023-nji ýylyň sentýabryndan 2024-nji ýylyň sentýabryna çenli orbitada bäşinji missiýasyny ýerine ýetirip, kosmosda bolan umumy wagty müň gije-gündize ýeten ilkinji adam boldy. Ýere dolanyp geleninden soň, onuň umumy uçuş wagty takmynan 1 111 gije-gündize ýetdi.
Kosmonawt awgust aýynda täze uçuşa taýýarlyk işlerine we gaýtadan türgenleşige girişendigini mälim edipdi.
Oleg Kononenko 1964-nji ýylda Türkmenistanyň Çärjew (häzirki Türkmenabat) şäherinde doguldy. Ol ilkinji orbital uçuşyny 2008-nji ýylyň 8-nji aprelinde bortinžener hökmünde amala aşyrdy. Orbitada işlän döwründe kosmonawt ýedi gezek açyk kosmosa çykdy. Geçen ýylyň noýabr aýyndan bäri bolsa ol Kosmonawtlary taýýarlamak merkeziniň ýolbaşçysynyň wezipesini ýerine ýetirýär.
Kononenko Türkmenistanyň we Russiýa Federasiýasynyň gahrymany diýen atlaryň, Türkmenistanyň «Altyn Aý» medalynyň eýesidir.
