Alymlar metany derman öndürmekde ulanyp boljak çylşyrymly himiki maddalara öwürmegiň täze usulyny işläp düzdüler. Bu baradaky barlag Science Advances žurnalynda çap edildi.
Taslamanyň esasy üstünligi – taryhda ilkinji gezek metandan gönüden-göni dimestrol maddasynyň alynmagydyr. Dimestrol gormonal terapiýada ulanylýan dermanlyk serişdedir. Adatça metan diňe ýangyç hökmünde ulanylýardy, indi bolsa bu maddany himiki senagaty üçin hem örän gymmatly çig mala öwürmek mümkinçiligi döredi.
Mesele metanyň gurluş taýdan örän durnukly bolmagyndadyr. Ol beýleki maddalar bilen aňsat-aňsat täsirleşmeýär. Santýago-de-Kompostela uniwersitetiniň professory Martin Fanýanasyň ýolbaşçylygyndaky topar bu meseläni demir esasly kömekçi madda we LED çyralaryň ýagtysy arkaly çözdüler. Täze usul täsirleşmäni dogry ugra gönükdirmäge we artykmaç galyndylaryň emele gelmegini azaltmaga mümkinçilik berdi.
Netijede barlagçylar metan molekulasyna zerur bolan himiki bölegi birleşdirip, ondan has çylşyrymly we gymmatly birleşmeleri almagy başardylar. Demriň ulanylmagy bu usuly has elýeterli we howpsuz edýär, täsirleşme bolsa agyr şertleri talap etmezden kadaly ýagdaýda geçýär.
