Nissan Pathfinder modeli iki görnüşde çykarylar – hem krossower, hem wnedorožnik

Nissan kompaniýasy özüniň häzir krossower bolan Pathfinder modelini täze ramaly wnedorožnik (ýolsuz ýerler üçin niýetlenen) bilen bilelikde satuwda saklamagy meýilleşdirýär diýlip, Automotive News neşiri habar berýär. Iki awtomobil hem ýeke-täk täjirçilik ady bilen satuwa çykarylar.
Neşiriň maglumatyna görä, ramaly (rama esasly) nusgasynyň önümçiligi 2029-njy ýylyň ortalaryna meýilleşdirilýär. Şol bir wagtyň özünde, öndüriji häzirki hereket edýän, ýük göteriji kuzowly krossoweriň nobatdaky täzelenişini geçirer. Täze ramaly ulag has burçly we "agras" dizaýna eýe bolar. Tehniki taýdan bu awtomobil benzinli içinden ýandyrylýan hereketlendiriji we gibrid güýç beriji ulgamy bilen üpjün ediler.
Brendiň bu strategiýasy önümleri dürli maksatly toparlar üçin anyk kesgitlemäge gönükdirilendir. Krossower has oňaýlylyga we rahatlyga üns berýän maşgalaly alyjylar üçin hödürlener. Ramaly model bolsa ýolsuz we kyn şertlerde sürmegi halaýanlar üçin niýetlener.
Kompaniýanyň ýolbaşçylary bu iki nusganyň bazarda näçe wagtlap bilelikde galjagyny geljekdäki isleglere görä kesgitlärler.
Belläp geçsek, geçen ýylyň güýzünde Pathfinder-iň häzirki nesli täzelenipdi. Awtomobil üýtgedilen radiator gözenegine, täze bamperlere, kämilleşdirilen yşyklandyryş ulgamyna we döwrebaplaşdyrylan salon enjamlaryna eýe boldy.