27-nji fewralda Baku şäherinde Türkmenistanyň we Azerbaýjanyň daşary syýasat edaralarynyň arasynda geňeşmeler geçirildi. Wekiliýetlere Türkmenistanyň daşary işler ministriniň orunbasary A.Gurbanow we Azerbaýjanyň daşary işler ministriniň orunbasary S.Şarifow ýolbaşçylyk etdi. Bu barada Türkmenistanyň DIM-iniň metbugat gullugy habar berýär.
Duşuşyklaryň dowamynda taraplar ikitaraplaýyn özara gatnaşyklaryň giň gerimli meselelerini, şeýle hem sebitleýin we halkara gün tertibiniň möhüm ugurlaryny maslahatlaşdy. Esasy üns syýasy-diplomatik gepleşikleri ösdürmäge, söwda we ykdysady hyzmatdaşlygy giňeltmäge, ulag-logistika we energetika ulgamlaryndaky özara gatnaşyklara, şeýle hem medeni-ynsanperwer gatnaşyklary berkitmäge gönükdirildi.
Aýratynlykda, ýokary derejeli çärelere taýýarlyk görmek, parlamentara hyzmatdaşlygyň orny, ykdysady hyzmatdaşlyk boýunça Türkmen-azerbaýjan hökümetara toparynyň işi, şeýle hem telekeçileriň arasyndaky gatnaşyklary ösdürmek we milli sergileri guramak meseleleri maslahatlaşyldy.
Taraplar halkara ulag geçelgeleriniň taslamalaryny amala aşyrmakda Türkmenistanyň we Azerbaýjanyň Aziýa bilen Ýewropanyň çatrygyndaky strategik ornuny, söwda-ykdysady gatnaşyklaryň diwersifikasiýalaşdyrylmagyny, hyzmatdaşlygyň täze geljegi uly ugurlaryny we medeni-ynsanperwer hyzmatdaşlygyň möhüm ornuny nygtady. Şeýle hem bilim we ylym ulgamyndaky özara hereketleriň, şol sanda akademiki alşygyň we ýokary okuw mekdepleriniň arasyndaky hyzmatdaşlygyň ähmiýeti bellenilip geçildi.
Geňeşmeleriň netijeleri boýunça taraplar konstruktiw dialogy dowam etdirmäge we özara bähbitli bolan ähli ugurlar boýunça hyzmatdaşlygy çuňlaşdyrmaga taýýardyklaryny tassyklady.
