Beýleki köp sanly iri kompaniýalaryň mysalyna eýerip, Apple dürli döwletleriň we sebitleriň kanunçylyk talaplaryna laýyk gelmek maksady bilen App Store dükanynda ulanyjynyň ýaşyny barlaýan ýörite gurallary işe girizdi. Kompaniýa Braziliýada, Awstraliýada, Singapurda, şeýle-de ABŞ-nyň Ýuta we Luiziana ştatlarynda hereket etjek bu ulgamlaryň işleýiş aýratynlyklary barada käbir jikme-jiklikleri mälim etdi.
Awstraliýadaky, Braziliýadaky we Singapurdaky ulanyjylar, eger öz ýaşyny App Store-yň awtomat görnüşde amala aşyrýan «akylly usullary» arkaly tassyklamasalar, «18+» derejeli programmalary ýükläp bilmezler. Şol bir wagtda, programmadyr oýunlary işläp düzüjiler ulanyjylaryň kämillik ýaşyna ýetendigini özbaşdak barlamak baradaky borçnamalary ýerine ýetirmek ýa-da bu meseläni çözmek üçin Apple-iň geçen ýyl hödürlän «Declared Age Range» atly ýörite API guralyndan peýdalanmak hukugyny saklap galýarlar.
Edil şonuň ýaly-da, 6-njy maýdan başlap Ýuta ştatynda we 1-nji iýuldan Luiziana ştatynda Apple hasaby bolan täze ulanyjylaryň ýaş derejeleri baradaky maglumatlar ýokarda agzalan API guraly arkaly beýleki programma işläp düzüjilere ýetiriler. Bu gurallar olara ulanyjynyň belli bir ýaş aralygyndadygyny barlamaga, şeýle-de çagalar üçin möhüm programma täzelemeleri gurnalan pursadynda ene-atalaryň ýa-da hossarlaryň rugsadyny soramaga mümkinçilik berer.
