Hytaýyň Xiaomi kompaniýasy özüniň içerki bazarynda Mijia Mini Washer atly kiçijik kir ýuwujy maşynyny hödürledi. Bu model az mukdardaky kirleri ýuwmak üçin niýetlenenligi we tygşytlylygy bilen tapawutlanýar.
Enjam bir gezeklik işinde bary-ýogy 0,08 kilowatt-sagat elektrik energiýasyny sarp edýär we 1,2 kilogram eşik ýüklemäge mümkinçilik berýär. Matalary ýörite usulda arassalamak arkaly bakteriýalaryň 99,99%-ini, şeýle hem wiruslary we tozan sakyrtgalaryny ýok etmäge ukyply çarhy bolan enjam bug arkaly zyýansyzlandyryş funksiýasyna we matalardaky tegmilleri aýyrmaga niýetlenen ýörite iş tertibine eýedir. Akylly guradyş algoritminiň esasynda sensorlar eşikleriň doly gurandygyny anyklap, prosesi özbaşdak duruzýar. Bu bolsa matalaryň gereginden artyk guradylyp durmagynyň öňüni alýar we energiýany tygşytlaýar. Ynjyk matalar üçin suwuň temperaturasy 35 °C bolan aýratyn tertip göz öňünde tutulypdyr.
Eger ýuwuş tamamlanandan soň gapy ýapyk galan bolsa, ýarym sagatdan soň howa çalşygy ulgamy işläp başlaýar. Bu mehanizm enjamyň içinde çyglylygyň toplanmagynyň we egin-eşikde ýakymsyz yslaryň emele gelmeginiň öňüni alýar.
Resmi maglumatlara görä, Hytaý bazarynda bu modeliň bahasy takmynan 280 ABŞ dollaryna deň. Enjam ilkinji nobatda ýaşaýyş meýdany çäkli bolan ulanyjylar we syýahat wagtynda ulanmak üçin ykjam çözgüt gözleýän adamlar üçin niýetlenen.
