Günorta Koreýada çaga dogluş derejesi soňky 15 ýylda ilkinji gezek ýokarlandy

Günorta Koreýada soňky 15 ýylyň dowamynda ilkinji gezek täze doglan çagalaryň sanynyň artandygy hasaba alyndy. «The Guardian» neşiriniň maglumatlaryna görä, 2025-nji ýylda ýurtda 254 500 çaga dünýä indi, bu bolsa bir ýyl ozalky görkezijiden 6,8% köpdür.
Çaga dogluş koeffisienti 0,75-den 0,8-e çenli ýokarlanyp, 2021-nji ýyldan bäri ilkinji gezek bu derejä gaýdyp geldi.
Bu ösüşiň esasy faktory «eho-bumerler» diýlip atlandyrylýan nesil, ýagny çaga dogluşynyň gysga wagtda birden ýokarlanan döwründe, 1991–1995-nji ýyllarda doglan adamlar boldy. Häzir olar 30 ýaş töwereginde bolup, adatça çaga dogurmagyň işjeň döwrüni başdan geçirýär. Bu ýaş toparyndaky aýallaryň sany 2020-nji ýyl bilen deňeşdirilende 9% artdy.
Pandemiýadan soňra nika sanynyň täzeden artmagy we çaga dogurmak meselesine bolan garaýşyň üýtgemegi hem goşmaça täsirini ýetirdi. Nikanyň ilkinji iki ýylynda çaga dogurmagyň sany 10,2% ýokarlandy, bu bolsa är-aýallaryň çaga edinmegi gijikdirmeýändigini görkezýär.
Bu ösüşe garamazdan, ýurduň ilatynyň sany azalmagyny dowam etdirýär: ölüm derejesi dogluş derejesinden, takmynan, 109 müň adam köp boldy. Günorta Koreýa Ykdysady Hyzmatdaşlyk we Ösüş Guramasynyň (OECD) agzalarynyň arasynda çaga dogluş koeffisienti 1,0-dan pes bolan ýeke-täk ýurt bolmagynda galýar. Demograflaryň bellemegine görä, «eho-bumerleriň» täsiri wagtlaýyn hadysadyr we ol 2027-nji ýyldan gowşap başlar.