Geçen dynç güni Braziliýada güýçli tupanly ýagyşlar ýagdy. Bu zerarly häzirki wagtda iň agyr ýagdaý Minas-Žeraýs ştatynyň Uba we Žuis-di-Fora şäherlerinde hasaba alyndy. Dowamly ýagyn sebäpli golaýdaky suw howdanlary kenaryndan aşyp, köçeleri sil aldy.
Güýçli suw akymlary ýol gyrasynda goýlan ulaglary, ýol germewlerini we ýeňil gurluşlary süýşürip alyp gitdi.
Internetde paýlaşylan wideoşekillerden awtomobilleriň suwuň basyşy bilen köçeleriň ugry bilen akyp gidişini görüp bolýar. Tebigy harasat has uly ulaglara-da täsirini ýetiripdir, güýçli akym uly ýük ulagyny agdardy.
Suw joşgunlary süýşgünler, giň gerimli weýrançylyklar we durmuş üçin möhüm hyzmatlaryň bökdençli işlemegine alyp bardy. Tebigy betbagtçylyk azyndan 30 adamyň heläk bolmagyna getirdi, ýene 39 adam bolsa dereksiz ýitenler hökmünde hasaba alyndy. Bu barada 24-nji fewralda CNN Brasil teleýaýlymy ştatyň Harby ýangyn söndüriş gullugyna salgylanyp habar berdi.
«Ir säherde suw joşguny netijesinde emele gelen weýrançylyklaryň astyndan 13 adam halas edildi. Halas edijileriň maglumatyna görä, halas edilenleriň sany jemi 208 adama ýetdi» diýlip, habarda bellenilýär.
