Toyota kompaniýasynyň Kanadadaky zawodynda Agility Robotics tarapyndan işlenip düzülen ýedi sany Digit atly gumanoid (adam şekilli) roboty işe girizildi. Bir ýyllyk synag möhletinden soň, bu robotlar RAV4 krossowerleriniň ýygnalyş prosesine doly goşuldy diýip, TechCrunch neşiri habar berýär.
Robotlar esasan ýük daşamak amallarynda ulanylýar. Olar awtomatlaşdyrylan arabalar arkaly ussahana getirilýän ätiýaçlyk şaýly konteýnerleri düşürýärler. Bu bolsa önümçilik depginini çaltlandyrmaga we işgärleriň fiziki agramyny azaltmaga ýardam edýär. Robotlar Arc bulut hyzmaty arkaly uzakdan dolandyrylýar.
Agility Robotics eýýäm özüniň Digit robotlaryny Amazon ýaly elektron söwda ägirtlerine we dürli logistika kompaniýalaryna hödürleýär. Kompaniýanyň bellemegine görä, robotlary bar bolan önümçilik ulgamyna ornaşdyrmak köplenç olary satyn almakdan hem gymmat düşýär. Şol sebäpli, robotlaryň netijeliligini artdyrmak üçin emeli aň tehnologiýalary işjeň ulanylýar.
Gumanoid robotlara diňe awtomobil senagaty däl, eýsem beýleki pudaklar hem uly gyzyklanma bildirýär. Mysal üçin, dünýäniň iň uly çip öndürijisi TSMC hem öz fabriklerinde Agility robotlaryny ulanmagy meýilleşdirýär. Häzirki wagtda hünärmenler adamlaryň golaýynda has howpsuz we sazlaşykly işläp biljek robotlaryň täze nesliniň üstünde işleýärler.
