76-njy Berlin kinofestiwalynyň baş baýragy — «Altyn Aýy» germaniýaly asly türk režissýor Ilker Çatakyň düşüren «Sary hatlar» (Gelbe Briefe) filmine gowşuryldy. Baýragyň gowşurylyş dabarasy 21-nji fewralda Potsdam meýdanyndaky Berlinale köşgünde geçirildi.
Bu ýyl žýurä režissýor Wim Wenders ýolbaşçylyk etdi.
Žýuri agzalarynyň Gran-prisi türk režissýory Emin Alperiň «Halas boluş» (Kurtuluş) filmine berildi. «Kümüş Aýy» baýragy bilen bolsa «Deňizde şa aýal» (Queen at Sea) filmi üçin amerikaly Len Hammer sylaglandy.
Iň gowy režissýorlyk üçin baýraga «Bill Ewansy hemme kişi halaýar» (Everybody Digs Bill Evans) filmi üçin britaniýaly režissýor Grant Gi mynasyp görüldi.
Baş rol üçin «Kümüş Aýy» baýragyna «Rouz» (Rose) filminde esasy keşbi janlandyran nemes aktrisasy Sandra Hüller mynasyp boldy. Ýeri gelende bellesek, Berlin kinofestiwaly 2021-nji ýyldan başlap bu baýragy erkek we aýal artistleri üçin aýratyn kategoriýa bölmekden ýüz öwrüp, ýekeje umumy baýrak gowşurýar.
Ikinji plandaky iň gowy keşpleri üçin baýraklara «Deňizde şa aýal» filmindäki rollary üçin Anna Kalder-Marşall we Tom Kortni eýe boldular.
Iň gowy ssenariýa üçin sylaga «Nina Roza» filminiň edebi esasyny ýazan kanadaly Ženewýewa Dýulýud-de Sel mynasyp boldy.
