Honda özbaşdak gonmagy başarýan ilkinji hususy uçarynyň nusgasyny görkezdi

Iki motorly Honda Elite II reaktiw uçary öz segmentinde Garmin-iň adatdan daşary awtomatik gonuş ulgamy üçin ABŞ-nyň Federal raýat awiasiýa müdiriýetiniň sertifikatyny alan ilkinji uçar boldy. Bu barada Honda Aircraft kompaniýasy habar berýär. Bu tehnologiýa adatdan daşary ýagdaý ýüze çykanda uçara awtonom usulda gonmaga mümkinçilik berýär.
Öndürijiniň maglumatynda aýdylyşy ýaly, Garmin EAL ulgamy iň amatly aerodromy saýlamak üçin meteoşertleri, ýeriň relýefini, galan ýangyjy we uçuş-gonuş zolagynyň göwrümini seljerýär. Enjam uçuş ölçegini özbaşdak sazlaýar, uçary ýere tarap ugradýar we doly saklanýança tormoz ulgamyny işjeňleşdirýär. Ulgam ýörite düwmäni basmak arkaly ýa-da uçarmanyň tarapyndan hiç hili täsir bolmadyk ýagdaýynda awtomatiki usulda işjeňleşýär. Şol bir wagtyň özünde, toplum bolup geçen waka barada howa hereketini dolandyryş gulluklaryna habar berýär.
Gonuş funksiýasyndan başga-da, bu model 2024-nji ýyldan bäri Garmin Autothrottle awtomatik dartyş güýjüni dolandyryş ulgamy bilen enjamlaşdyrylýar. Bu tehnologiýa uçuşyň ähli tapgyrlarynda hereketlendirijileriň iş tertibini kadalaşdyrýar. Honda Aircraft-yň wekilleriniň bellemegine görä, EAL we Autothrottle ulgamlarynyň bilelikde ulanylmagy ekipažyň agramyny azaldýar we uçary bir uçarmanyň dolandyrmagyna mümkinçilik berýär. Häzirki wagtda kompaniýa beýleki bazarlaryň kadalaşdyryjy edaralaryndan hem bu çözgütler üçin degişli sertifikatlaryna garaşýar.