Müsürde üsti altyn bilen örtülen 4300 ýyllyk abat mumiýa tapyldy

Arheologlar Müsüriň Sakkara nekropolyndan 4300 ýyl ozal möhürlenen hek daşyndan ýasalan sarkofagy açdylar. Onuň içinden altyn çaýylan, heniz ellenmedik görnüşde mumiýa tapyldy. Earth neşiriniň habar bermegine görä, 15 metrlik şahtanyň düýbünden tapylan bu gubur Gadymy patyşalygyň Bäşinji we Altynjy nesilleriniň döwrüne degişlidir.
Sarkofagyň içinde ýerlenen Heka-Şepes atly adamyň bedeni oralan matanyň üstünden ýukajyk altyn gatlaklar bilen örtülipdir. Altynyň beýle bol ulanylmagy, ýogalan adamyň jemgyýetdäki derejesiniň ýokary bolandygyna şaýatlyk edýär. Bu täsin tapyndy ÝUNESKO-nyň Bütindünýä mirasynyň sanawyna girýän Memfis nekropolyndaky gazuw-agtaryş işleriniň dowamynda ýüze çykaryldy.
Arheologlar ol ýerde esasy otagdan başga-da, ýene iki sany şahtanyň üstünden bardylar. Şahtalaryň birinden patyşalyk toplumynyň ruhanysyna degişli bolan, reňklenen hek daşyndan ýasalan 9 sany heýkeljik çykdy. 10 metrlik beýleki bir şahta bolsa Fetek atly adamyň aram tapan ýerine alyp bardy. Ol ýerden hem agaç we daş heýkeller, sadaka saçagy we sarkofag tapyldy.
Mundan başga-da, alymlar dürli tumarlary, kosmetika gaplary we gündelik durmuşda ulanylýan keramiki gap-çanaklary tapdylar. Guburlaryň diwarlaryndaky iýeroglif ýazgylarynda ýogalanlaryň derejesi we garyndaşlyk gatnaşyklary barada maglumatlar berilýär. Ähli tapyndylar saklamak we resmileşdirilmek üçin degişli ýerlere ugradyldy.