Warner Bros. kompaniýasy «Mumiýa» («Мумия») filminiň ilkinji treýlerini köpçülige hödürledi. Filmiň dünýä premýerasy 15-nji aprele meýilleşdirilýär.
Filmiň wakalary çölüň ortasynda dereksiz ýiten žurnalistiň gyzy barada gürrüň berýär. Aradan sekiz ýyl geçenden soň, gyz tapylýar we öýüne gaýtarylýar. Emma bu habar maşgalasy üçin diňe bir şatlyk däl-de, eýsem garaşylmadyk gorkunç wakalaryň başlangyjyna öwrülýär. Maşgala agzalarynyň adaty durmuşy tiz wagtdan elhenç hadysalar bilen sarsylýar.
Filmiň režissýory we ssenariçisi — «Özge» («Другой») we «Zulmat ölüleriniň direlişi» («Восстание зловещих мертвецов») ýaly gorkunç filmleri bilen tanalýan irlandiýaly Li Kronin boldy.
«Bu siziň şu wagta çenli gören „Mumiýa“ filmleriňiziň hiç birine meňzemez. Men örän gadymy we gaty gorkunç bir zady ýeriň düýbünden ýokary çykarmak üçin has çuňluga aralaşýaryn» diýip, režissýor täze taslamasy barada aýdýar.
Filmde baş keşpleri Jek Reýnor, Laýa Kosta, Meý Kalamawi, Natali Greýs we Weronika Falkon ýaly aktyorlar janlandyrýar. Kinonyň sazlaryny kompozitor Stiwen MakKeon ýazdy.
Stiwen Sommersiň nusgawy «Mumiýa» filmi (1999-njy ýyl) (1932-nji ýyldaky nusgasynyň remeýki) dünýä kassa ýygymynda 416 million dollardan gowrak girdeji gazandy we iki sany dowamy, şeýle hem «Içýanlaryň patyşasy» («Царь скорпионов») spin-off-yny döretdi.
2017-nji ýylda Tom Kruzuň gatnaşmagynda amala aşyrylan täze taslama garaşylan netijäni bermedi, bu bolsa studiýanyň «Garaňky älem» («Темной вселенной») taslamasyndan el çekmegine sebäp boldy.
Ýakynda Universal Pictures studiýasy asyl nusgadaky ýyldyzlar — Brendan Freýzer we Reýçel Waýs bilen bilelikde filmiň resmi dördünji bölüminiň surata düşüriljekdigini hem tassyklady.
