Awstraliýaly alymlar topary Antarktikanyň suwlarynda, Günorta Şetland adalarynyň golaýynda ilkinji gezek akulanyň bardygyny hasaba aldy. Bu barada Associated Press habarlar agentligi habar berýär.
Günbatar Awstraliýa uniwersitetiniň professory Alan Jeýmison: «Biz ol ýerde akula göreris diýip garaşmandyk, sebäbi Antarktikada akulalar ýok diýen umumy kabul edilen ylmy garaýyş bardy» diýip belledi. Onuň aýtmagyna görä, akula, takmynan, 490 metr çuňlukda ýörite barlag enjamyna oturdylan kameranyň kömegi bilen wideo düşürildi. Bu ýerde suwuň temperaturasy Selsiý boýunça 0 gradusa golaýdyr.
Deňziň düýbi bilen «pessaýlyk bilen ýüzüp barýan» akulanyň boýy 3-4 metr töweregi diýlip hasaplanylýar. Professor onuň kiçi göwrümli akula däldigini belleýär. Jeýmison Antarktidanyň kenarýakalarynda kitleriň we äpet kalmarlaryň galyndylary bilen iýmitlenýän beýleki akulalaryň hem bolmagynyň mümkindigini öňe sürýär.
Akula aslynda 2025-nji ýylyň ýanwar aýynda kamera düşürilen hem bolsa, uniwersitet diňe şu hepde maglumatlary we suratlary köpçülige ýaýratmaga rugsat berdi.
Mundan öň alymlaryň diňe Awstraliýanyň, Täze Zelandiýanyň we Günorta Afrikanyň kenarýakalarynda, Ýuwaş, Hindi we Atlantik ummanlarynyň günorta künjeklerinde ýaşaýan Antarktika polýar akulalary barada habary bardy.
Antarktidanyň kenarýakalarynda ilkinji gezek akula göründi
- şu gün 21:38
- 1.7k+
