Tutanhamonyň duşmanlaryny dep eden «sandallary» görkezildi

Arheologlar Tutanhamonyň aramgähinden tapylan we iç ýüzünde faraonyň el-aýagy daňylgy duşmanlary şekillendirilen gyzykly bir jübüt sandaly görkezdiler.
Takmynan, 3 300 ýyllyk taryhy bolan bu aýakgap 1922-nji ýylda britaniýaly arheolog Goward Karter tarapyndan tapylypdy.
45-lik ölçegdäki sandallar agaçdan ýasalypdyr we ýüzüne altyn gurşun, ýaşyl deri hem-de gymmat bahaly serişdeler çaýylypdyr. Her sandalyň ortasynda lotos we papirus bilen daňylan iki sany ýesir şekillendirilipdir. Aýakgabyň gyrasyndaky sekiz sany ýarag bolsa kemeri bilen bilelikde Müsüriň ähli duşmanlaryny aňladýan "Dokuz ýaý" nyşanyny emele getirýär.
Bu kompozisiýa faraonyň şeksiz häkimiýetini aňladýar we ondan çen tutup, patyşa ýörän mahaly onuň aýaklary duşmanlarynyň üstünden basyp geçýär diýen manyny çykarmak mümkin. Tutanhampnyň mumiýasynda diňe bir taryhy şekilli aýakgaplar däl, eýsem, sap altyndan ýasalan sandallar we aýak barmaklary üçin niýetlenen ýörite altyn gaplamalar hem tapyldy. Emma bu sandallary faraonyň diri wagty geýendigi ýa-da diňe jaýlanyş dessury üçin ýasalandygy entek nämälimligine galýar.
Häzirki wagtda bu gymmatlyk Kairdäki Müsür muzeýinde saklanylýar.