Türkmen okuwçylary 2026-njy ýylyň 10 — 13-nji fewraly aralygynda Astana şäherinde geçirilen FIRST Tech Challenge (FTC) robot tehnikasy boýunça çempionatyň sebit tapgyrynda uly üstünlik gazandy.
Aşgabat şäheriniň 97-nji we 86-njy ýöriteleşdirilen orta mekdepleriniň okuwçylaryndan düzülen «Oguzrobot» topary ýokary ussatlyk görkezip, eminleriň karary bilen Hytaý Halk Respublikasynda geçiriljek halkara robot ýaryşyna gatnaşmak üçin ýörite hukuk (kwota) aldy.
Gazagystandaky bäsleşige dünýäniň dürli ýurtlaryndan, şol sanda Gonkongdan, Wýetnamdan, Özbegistandan we Estoniýadan 80-e golaý topar gatnaşdy. Güýçli bäsdeşlik şertlerinde türkmen ýaşlary başlangyç tapgyrlardan ynamly geçip, saýlama tapgyryna geçmegi başardy. Eminler topary «Kämil bilim» okuw merkezinde taýýarlyk geçen toparyň innowasion çözgütlerine we ýokary tehniki ukyplaryna aýratyn baha berdi.
Astanadaky bu ýeňiş geçen ýyl «Halkara üstünlik» baýragyna mynasyp bolan toparyň nobatdaky uly netijesidir. Şeýle üstünlikler Türkmenistanda STEM biliminiň netijeli ösdürilýändiginiň hem-de ýokary tehnologiýalar we inženerçilik babatda ýaşlaryň uly mümkinçilikleriniň aýdyň subutnamasydyr.
Türkmenistandan «Oguzrobot» topary Hytaýda geçiriljek ýaryşa gatnaşmaga hukuk gazandy
- 18.02.2026 16:51
- 3.2k+
