El-Kuweýtde türkmen-kuweýt söwda-ykdysady gatnaşyklarynyň täze ugurlary kesgitlenildi

2026-njy ýylyň 16-njy fewralynda El-Kuweýt şäherinde Türkmenistanyň we Kuweýt Döwletiniň işewür toparlarynyň wekilleriniň duşuşygy geçirildi. Bu taryhy saparyň çäklerinde Türkmenistanyň resmi ykdysady wekiliýeti ilkinji gezek Kuweýtiň Söwda-senagat edarasynda kabul edildi. Bu barada Türkmenistanyň Daşary işler ministrliginiň metbugat gullugy habar berýär.
Türkmenistanyň Söwda-senagat edarasynyň başlygy Mergen Gurdowyň Kuweýtiň Söwda-senagat edarasynyň baş direktorynyň orunbasary Firas Al-Ouda bilen geçiren gepleşikleriniň barşynda ikitaraplaýyn söwda-ykdysady hyzmatdaşlygy giňeltmek we ileri tutulýan pudaklara maýa goýumlaryny çekmek meseleleri ara alnyp maslahatlaşyldy.
Taraplar iki ýurduň kompaniýalarynyň arasynda hemişelik hyzmatdaşlyk platformasyny döretmek we göni gatnaşyklaryň durnukly mehanizmlerini ýola goýmak barada ylalaşdy. Bu başlangyçlaryň logistika ulgamyny kämilleşdirmäge we hyzmatdaşlygyň hukuk binýadyny berkitmäge ýardam etjekdigi nygtaldy.
Duşuşykda Türkmenistanyň amatly geografiki ýerleşişi we ygtybarly strategik hyzmatdaş hökmündäki orny aýratyn bellenildi. Hyzmatdaşlygyň geljegi uly ugurlary hökmünde azyk howpsuzlygyny üpjün etmek, senagat hyzmatdaşlygyny ösdürmek, energetika we nebit-himiýa pudaklaryndaky bilelikdäki taslamalar bellenildi.
Gepleşikleriň ahyrynda taraplar özara bähbitli ykdysady gatnaşyklary yzygiderli ösdürmäge taýýardyklaryny tassyklady.