Hindistanda ChatGPT-niň hepdelik işjeň ulanyjylarynyň sany 100 milliona ýetdi

Hindistan ChatGPT-niň hepdede 100 million işjeň ulanyjy görkezijisine ýetdi. Bu görkeziji ýurdy ABŞ-dan soň OpenAI kompaniýasynyň dünýädäki ikinji uly bazaryna öwürdi. Bu barada Nýu-Delide geçirilýän emeli aň boýunça hökümet sammitiniň öňüsyrasynda OpenAI-yň baş direktory Sem Altman habar berdi.
Times of India neşiri üçin makalada Altman ChatGPT-niň Hindistandaky çalt ösüşini belledi. 2025-nji ýylyň awgustynda OpenAI Nýu-Delide öz edarasyny açdy we hyzmaty ýerli bazara uýgunlaşdyrdy: bahasy 5 dollardan hem arzan bolan ChatGPT Go nyrhnamasyny girizdi, soňra bolsa ony hindi ulanyjylary üçin bir ýyl mugt elýeterli etdi.
Bu ösüşde esasy orny talyplar eýeleýär: emeli aň gurşawyndaky halkara kompaniýalar hindi talyplaryna mugt ýazylyşyklary we bilim gurallaryny hödürleýär. Hususan-da, Google kompaniýasy 2025-nji ýylyň sentýabrynda talyplara bir ýyllyk AI Pro hyzmatyny mugt berdi.
Altman Hindistanda monetizasiýanyň kyndygyny, elýeterliligiň deň bolmazlygynyň we infrastruktura çäklendirmeleriniň bolsa emeli aňyň demokratik ýol bilen ornaşdyrylmagyny haýalladyp biljekdigini nygtady. OpenAI tehnologiýalara elýeterliligi ýokarlandyrmak üçin hökümet bilen hyzmatdaşlygy giňeltmegi meýilleşdirýär.
Bäş gün dowam etjek India AI Impact Summit sammiti dünýäniň we Hindistanyň öňdebaryjy tehnologiýa hem syýasat wekillerini bir ýere jemlär. Olaryň arasynda Anthropic-iň ýolbaşçysy Dario Amodei, Google-dan Sundar Piçai, Mukeş Ambani we Nandan Nilekani hem bar.