Şyrkyldawuk leňňeçler öz gyrkyçlaryny gulagyňy deşip barýan derejede şyrkyldadyp, awlaryny we garşydaşlaryny seňseletmek ukyby bilen meşhur. Olar şeýle edenlerinde ýokary tizlikli suw akymyny döredip, güýçli urgy tolkunyny emele getirýärler. Alymlar şu wagta çenli bu jandarlaryň şeýle uly güýçden özlerini nädip goraýandyklaryna jogap tapyp bilmeýärdiler. Ýakynda bu soraga jogap bolup biljek maglumatlar Journal of the Royal Society Interface žurnalynda çap edildi.
Günorta Karolina we Talsa uniwersitetleriniň alymlarynyň geçiren barlagyna görä, şyrkyldawuk leňňeçler öz beýnisini we gözlerini ýörite dury gorag «galkany» arkaly goraýarlar. Leňňeçleriň daşky skeletine berkidilen «galkan» olaryň kelle böleginde ýerleşýär.
Biologlar barlagyň dowamynda Günorta Karolinanyň derýalaryndan ýygnalan janly leňňeçleri öwrendiler. Geçirilen ölçegler leňňeçleriň kellesindäki bu «başgabyň» esasy gabyga garanyňda iki esse ýumşakdygyny görkezdi. Hut şu aýratynlyk onuň urgy tolkunynyň energiýasyny endigan ýaýratmagyna şert döredýär. Kompýuter modelirlemesi bu gurluşyň urgy tolkunynyň güýjüni azaldýandygy-da tassyklady. Goşmaça geçirilen synaglar bolsa urgy mahaly «başgaply» leňňeçleriň hiç hili zeper çekmändiklerini, «başgapsyz» leňňeçleriň bolsa ugur-ýollaryny ýitirip, biraz wagt hereketden galandyklaryny görkezdi.
Alymlaryň bellemegine görä, bu janly tebigatda kelle-beýni şikeslerinden goranmak üçin ýüze çykan ilkinji anyk biologik nusgadyr. Geljekde bu ylmy netijeler adamlar üçin has kämil we täsirli gorag serişdelerini döretmekde hem ulanylyp bilner.
