Google indi EA-modellerine Disney gahrymanlarynyň suratlaryny döretdirmeýär

Google-yň emeli aň modelleri Disney gahrymanlary bilen baglanyşykly tabşyryklary ret edip başlady. Üýtgeşmeler dekabr aýynda Disney-iň kompaniýany intellektual eýeçilik hukuklaryny bozmakda aýyplamagyndan soň başlandy.
Studiýanyň pikiriçe, Google-yň emeli aň önümleri meşhur gahrymanlaryň keşplerini tekst soraglary boýunça ýokary hilli suratlary döredýän «wirtual söwda awtomaty» ýaly ulandylar. Gürrüň meşhur fransizalaryň gahrymanlary bolan Ýoda, Dart Weýder, Demir adam we Winni-Puh barada gidýär. Şu günden başlap, tekst arkaly şeýle suratlary döretmek synanyşygynda Google-yň emeli aň modelleri, şol sanda Gemini we Nano Banana: «Men häzirki wagtda kontent üpjünçileriniň beýleki tarapynyň aladalary sebäpli siziň haýyş eden suratyňyzy döredip bilmeýärin. Haýyş edýärin, soragyňyzy üýtgediň we gaýtadan synanyşyň» diýen ýaly jogaplary berýärler.
Muňa garamazdan, ulanyjylar gahrymanyň fotosuratyny ýükläp, ony tekst arkaly üstüni ýetirse, Google-yň emeli aň hyzmatlary Disney bilen baglanyşykly suratlary döretmegi  dowam etdirýär.
Kompaniýalaryň arasyndaky gapma-garşylyk dekabrda, Disney-iň Google-a awtorlyk hukuklarynyň bozulmagyny we emeli aň modelleriniň studiýanyň materiallarynda tälim berilmegini bes etmegi talap edýän 32 sahypalyk hat ugratmagy bilen başlandy. Mundan ozal Disney birnäçe aýlap öz nägileligini bildirse-de, hiç hili netije bermändi. Duýduryş Disney-iň OpenAI bilen 1 milliard dollarlyk lisenziýa ylalaşygyny baglaşan döwri bilen bir wagtda diýen ýaly ugradylypdy.
«Biziň Disney bilen uzak möhletli we özara bähbitli gatnaşyklarymyz bar we hyzmatdaşlygy mundan beýläk hem dowam etdireris. Biz öz emeli aňlarymyzy döretmek üçin açyk internetdäki hemmelere elýeterli maglumatlary ulanýarys we saýtlara hem-de hukuk eýelerine öz kontentlerine gözegçilik etmäge mümkinçilik berýän Google-extended we YouTube üçin Content ID ýaly goşmaça awtorlyk hukugy gurallaryny işläp düzdük» — diýip, Google-yň wekili bu ýagdaý barada düşündiriş berýär.