Hytaýda akylly sürüjilik ulgamlaryna (smart driving systems) ýöriteleşdirilen täze iri synag merkezi ulanmaga berildi. 5000 inedördül metrden gowrak meýdany eýeleýän bu laboratoriýa awtoulaglaryň elektron kömekçilerini goýy ümür, güýçli ýagyş we beýleki adatdan daşary şertlerde synagdan geçirmäge mümkinçilik berýär. Bu baradaky habar Hytaýyň CCTV teleýaýlymy tarapyndan ýaýratyldy.
Laboratoriýanyň içindäki ýöriteleşdirilen meýdança hakyky ýol şertlerini iň jikme-jik görnüşde janlandyrmaga ukyplydyr. Günüň dürli wagtlary (gije/gündiz), dürli derejeli ýagyş we görüş derejesini peseldýän dumanly howa öýkünmesi bar. Ulaglaryň dykyz gatnawy, pyýadalar, motosiklçiler we garaşylmadyk ýol hadysalary gurnalýar. Synag awtoulaglary jaýyň içinde sagatda 130 kilometre çenli tizlik bilen hereket edip bilýärler.
Laboratoriýanyň ilkinji müşderisi "Changan" kompaniýasynyň Nevo A06 modeli boldy. Synaglaryň dowamynda ADAS (Sürüjä kömek berýän ösen ulgamlar) tehnologiýasynyň nähili işleýändigine baha berildi.
Elektron kömekçileriň ýol şertlerini nähili dogry okaýandygy barlanýar.
Ulgamyň howp barada duýduryş beriş tizligi we heläkçilikli ýagdaýlarda awtomatiki tormozlama ýa-da öwrülme manýowrlaryny ýerine ýetirişi öwrenilýär.
Bu täze merkez Hytaýyň awtomobil howpsuzlygyndaky ýeke-täk ädimi däl. Geçen ýylyň dekabr aýynda Geely kompaniýasy 82 000 inedördül metr meýdany eýeleýän, dünýäde ilkinji iri göwrümli howpsuzlyk merkezini açypdy. 2 milliard ýuana (280 million dollardan gowrak) düşen bu äpet merkezde 27 görnüşli dürli synaglary geçirmek mümkindir.
