Marrakeşde Türkmenistanyň gatnaşmagynda Çaga zähmetini aradan aýyrmak boýunça maslahat geçirilýär

Türkmenistanyň wekiliýeti 2026-njy ýylyň 11-13-nji fewraly aralygynda Marokko Patyşalygynyň Hökümetiniň we Halkara Zähmet Guramasynyň (HZG) guramagynda geçirilýän Çaga zähmetini aradan aýyrmak boýunça altynjy bütindünýä maslahatyna gatnaşýar. Bu barada Türkmenistanyň DIM-niň metbugat gullugy habar berdi.
Bu halkara forum çaga zähmetini çaltlandyrylan tertipde aradan aýyrmaga gönükdirilen bilelikdäki çäreleri işläp taýýarlamak üçin döwletleriň, halkara guramalaryň we jemgyýetçilik hyzmatdaşlaryň wekillerini bir ýere jemleýär.
Maslahatyň maksatnamasy ýokary derejeli umumy mejlisleri, tematiki sessiýalary we ýörite çäreleri öz içine alýar. Olaryň dowamynda gatnaşyjylar tejribe alyşýar, netijeli usullary ara alyp maslahatlaşýar we halkara hyzmatdaşlygyny, aýratyn-da, çagalaryň bilimi we durmuş goraglylygy babatynda hyzmatdaşlygy giňeltmek meselelerine garaýar.
Türkmenistanyň bu çärä gatnaşmagy ýurduň halkara giňişligindäki abraýynyň barha artýandygyny, şeýle hem onuň netijeli gepleşiklere we ynsanperwer gymmatlyklary öňe sürmäge ygrarlydygyny tassyklaýar.