Jeýson Momoa "Arrowhead Game Studios" tarapyndan döredilen meşhur wideo oýnunyň esasynda surata düşüriljek "Helldivers" filminde baş keşbi janlandyrmaga hukuk gazandy. Bu barada "The Hollywood Reporter" neşiri habar berýär.
Filmiň režisýory "Forsaž" (Fast & Furious) franşizasy bilen tanalýan Jastin Lin bolar. Taslamany "Sony Pictures" we "PlayStation Productions" kompaniýalary bilelikde taýýarlaýar. Filmiň premýerasy 2027-nji ýylyň 10-njy noýabryna meýilleşdirildi.
Ssenariýany "It" we "Annabelle" ýaly filmleriň awtory Geri Doberman ýazdy. Prodýuserler toparynda Hatç Parker, Asad Kyzylbaş we Jastin Lin bar. Taslamanyň beýleki aktýorlary heniz mälim edilmedi.
Film "Super Ýer" diýlip atlandyrylýan fantastiki planeta wehim salýan gelmişeklere garşy söweşýän elit esgerler topary barada gürrüň berer.
Aktýor "Tagtlaryň oýny" (Game of Thrones) seriýasyndaky Hal Drogo, DC älemindäki Akwamen we "Minecraft" filmindäki Garret Garrison keşpleri bilen dünýä meşhurdyr.
"Helldivers" oýnunyň birinji bölegi 2015-nji ýylda, ikinji bölegi bolsa 2024-nji ýylda çykdy. "Helldivers 2" çykan ilkinji üç aýynyň içinde 12 million nusgada satylyp, Sony-nyň iň şowly oýunlarynyň birine öwrüldi. Bu taslama bolsa agzalan oýun seriýasy boýunça surata düşürilýän ilkinji filmdir.
