X sosial ulgamynyň (öňki Twitter) eýesi Ilon Mask bu programmany gurnan adamlaryň sanynyň bir milliarddan aşandygyny mälim etdi.
"Biziň bir milliard ulanyjy barada aýtmagymyzyň sebäbi, ortaça aýlyk ulanyjylarymyzyň sany 600 million töweregi bolsa-da, goşundyny ýükläp alanlaryň sany bir milliarddan ep-esli köpdür. Ulanyjylaryň köpüsi goşunda diňe dünýäde möhüm wakalar bolup geçende girýärler. Ýöne biz adamlara X-i ulanmak üçin has köp sebäp döredýäris. Goý ol Grok emeli aňy bolsun ýa-da X Money maliýe hyzmatlary bolsun. Biz bu platformanyň adamlaryň gündelik durmuşynyň bir bölegine öwrülmegini isleýäris. Platformany has peýdaly etdigimizçe, gündelik işjeň ulanyjylaryň sanynyň hem bir milliarddan geçjekdigine ynanýaryn" — diýip, ol belledi.
Platformanyň topary esasy görkezijileriň ösüşi barada hem maglumat berdi. Täze ulanyjylaryň goşundyda sarp edýän wagty geçen ýyl bilen deňeşdirilende 43%, öňden bar bolan ulanyjylaryňky bolsa 20% artdy. Goşundynyň ýükleniş sany 60% ýokarlanyp, aýda 120 milliona ýetdi. Abunalardan gelýän girdeji 1 milliard dollardan geçdi. Ýanwar aýynda ulanyjylaryň işjeňligi iň ýokary derejä ýetdi we fewral aýynyň netijeleri boýunça bu görkezijiniň täzelenmegine garaşylýar.
