Gyrgyzystanly model Şadiýa Isaýewa Seulda geçirilen moda hepdeliginiň görkezilişlerine gatnaşyp, dünýä belli «Vogue» žurnalynyň sahypalaryna düşdi.
Isaýewa hepdeligiň dowamynda birnäçe görkezilişde boldy. Çäräniň dördünji gününde ol meýdança gyrgyzlaryň milli lybasynda barmagy ýüregine düwdi. Ýanynda doly görnüşli milli lybasy bolmadyk model gyz atasynyň donuny geýip, enesiniň ýaglygyny daňynmagy makul bildi. Onuň aýtmagyna görä, eşik oňa mähribanlaryndan ýadygär galypdyr.
«Şu usul arkaly men öz ýurdumyň milli medeniýetini we öz şahsy taryhymy meniň üçin hakykatdan hem ähmiýetli bolan zatlaryň üsti bilen görkezmek isledim» diýip, Isaýewa köp kişiniň ünsüni çeken hereketiniň maksadyny TikTok-daky teswirinde düşündirýär.
Görkezilişleriň birinde fotohabarçy Ýang Çul Kim modeli surata düşürdi. Netijede, Şadiýa Isaýewanyň gatnaşmagyndaky suratlar Seul moda hepdeliginiň iň gowy keşpleriniň sanawyna girip, «Vogue» žurnalynda çap edildi.
Atasynyň donuny geýip, enesiniň ýaglygyny daňynan gyrgyz modeli moda hepdeliginiň ýyldyzy boldy
- 12.02.2026 20:56
- 14k+
