ABŞ-nyň Söwda ministrligi ýurduň tehnologiýa ägirtleri bolan Amazon, Google we Microsoft kompaniýalaryny ýarymgeçirijileriň importyna giriziljek täze gümrük paçlaryndan boşatmagy meýilleşdirýär.
Bu başlangyç dünýäniň iň uly çip öndürijisi bolan Taýwanyň TSMC kompaniýasynyň ABŞ-daky maýa goýum taslamalary bilen göni baglanyşyklydyr. Paçlaryň ýatyrylmagy maglumat merkezleri we emeli aň ulgamlary üçin ösen çipleri satyn alýan bulut üpjün edijileriniň maliýe çykdajylaryny azaltmaga gönükdirilendir.
Çaklamalara görä, TSMC özüniň amerikan müşderileriniň arasynda gümrük pajyndan boşadylmagyň kwotalaryny paýlamak hukugyna eýe bolar. Bu kwotalaryň möçberi TSMC-niň ABŞ-da guran önümçilik desgalaryna goýan maýa goýumlarynyň gerimine bagly bolar.
Ak Tam bu mehanizm arkaly bir wagtyň özünde hem ýerli çip önümçiligini höweslendirmegi, hem-de amerikan IT korporasiýalarynyň dünýä bazaryndaky bäsdeşlik ukybyny gorap saklamagy maksat edinýär.
Ak Tam ýanwar aýynda çip importyna ýokary paçlary girizmek meýilnamasyny yglan edipdi, ýöne ýeňillikleriň berliş tertibi häzirki wagtda gutarnykly işlenilýär. Hünärmenleriň bellemegine görä, bu ýeňillikler esasan emeli aň (AI) infrastrukturasynda ulanylýan iň täze we ýokary tehnologiýaly komponentlere degişli bolar.
Häzirki wagtda bu meýilnama diňe maslahatlaşma tapgyryndadyr. Maksatnamanyň anyk görkezijileriniň geljek aýlarda gutarnykly ylalaşylmagyna we tassyklanmagyna garaşylýar.
