Türkmen wekiliýeti Berlinde «MA – Germaniýa» görnüşindäki duşuşyga gatnaşdy

2026-njy ýylyň 11-nji fewralynda Berlinde Merkezi Aziýa ýurtlarynyň daşary syýasat edaralarynyň ýolbaşçylarynyň Germaniýanyň Federal daşary işler ministri bilen giň gerimli duşuşygy geçirildi. Gepleşiklerde türkmen tarapyna daşary işler ministriniň orunbasary Ahmet Gurbanow wekilçilik etdi.
Umumy mejlisiň dowamynda taraplar energetika hyzmatdaşlygyny we sebit hyzmatdaşlygyny ösdürmek meselelerini ara alyp maslahatlaşdy. Aýratyn üns sebit howpsuzlygyna gönükdirildi. Merkezi Aziýada we ýanaşyk sebitlerde durnuklylygy goldamak maksady bilen, syýasy-diplomatik gatnaşyklary çuňlaşdyrmagyň ähmiýeti bellenildi. Şeýle-de, sebitiň ýurtlarynyň çäklerinde bilelikdäki önümçilikleri, hyzmat we bilim merkezlerini döretmegiň mümkinçiliklerine seredildi.
Duşuşygyň ahyrynda köptaraplaýyn hyzmatdaşlygyň möhüm ugurlaryny öz içine alýan we «Merkezi Aziýa — Germaniýa» formatyny ösdürmäge gönükdirilen Ministrleriň Berlin jarnamasy kabul edildi.
Saparyň çäginde Ahmet Gurbanow Germaniýa Federatiw Respublikasynyň Federal Prezidenti Frank-Walter Ştaýnmaýer bilen geçirilen bilelikdäki duşuşyga gatnaşdy.
Onda taraplar gatnaşyklaryň yzygiderli ösýändigini we BMG-niň hem-de Ýewropada Howpsuzlyk we Hyzmatdaşlyk Guramasynyň çäklerinde hyzmatdaşlygy berkitmegiň ähmiýetini tassyklady. Ulag, energetika, bilim, saglygy goraýyş we «ýaşyl» özgertmeler meselelerine aýratyn üns berildi.
Şeýle hem şol gün türkmen diplomatynyň GFR-iň DIM-niň syýasy departamentiniň direktory Dominik Mutter bilen duşuşygy boldy. Onuň dowamynda syýasy-diplomatik, söwda-ykdysady we medeni-ynsanperwer ulgamlardaky meseleleriň giň toplumyna garaldy.
Ahmet Gurbanow Bundestagyň Daşary işler baradaky komitetiniň başlygy Armin Laşet we sebit ýurtlarynyň daşary syýasat edaralarynyň wekilleri bilen bilelikdäki duşuşyga hem gatnaşdy. Taraplar parlamentara gatnaşyklaryň ösüşine ýokary baha berip, dostluk toparlarynyň işini işjeňleşdirmegiň zerurdygyny belledi. Duşuşyklaryň ahyrynda türkmen tarapy ähli esasy ugurlar boýunça özara bähbitli hyzmatdaşlygy giňeltmäge taýýardygyny tassyklap, jenap Armin Laşeti we german wekiliýetiniň agzalaryny özleri üçin amatly wagtda Türkmenistana gelmäge çagyrdy.