«Karib deňziniň garakçylary» Margo Robbi we täze gahrymanlar bilen dolanýar

Disney dünýä belli «Karib deňziniň garakçylary» filminiň dowamyny surata düşürmäge taýýarlanýar we ony ýakyn wagtda amala aşyrmaly esasy täze taslamalaryň hatarynda görýär. Bu barada studiýanyň öz çeşmelerine salgylanyp, tanymal insaýder Jeff Snaýder habar berdi.
Habarda bellenilişine görä, altynjy filmiň ssenariýasyny ýazdyrmak üçin «1917» harby dramasy bilen «Oskar» baýragyna dalaşgärlik eden Kristi Wilson-Kernis bilen gepleşikler alnyp barylýar.
Täze filmiň sýužeti meşhur kapitan Jek Serçäniň ogluna we täze zenan gahrymanyna gönükdiriler. Baş gahryman zenanyň keşbini janlandyrmak üçin aktrisa Margo Robbi göz öňünde tutulýar. Aslynda öň bu aktrisanyň gatnaşmagynda aýratyn bir film surata düşüriler diýlip garaşylýardy, indi bolsa Disney ony esasy sýužetiň içine goşmagy meýilleşdirýär. Margo Robbiniň gahrymany häsiýeti boýunça Jek Serçä we Emma Stounyň janlandyran Kruella de Wil atly gahrymana çalymdaşrak biri bolar.
Köp sanly muşdaklary gyzyklandyrýan «Jonni Depp Jek Serçäniň keşbinde oýnarmyka?» diýen soragyň häzir hem anyk jogaby ýok. Biz oňa derek,  Deppiň edil  baş keşpde oýnamasa-da, filmiň epizodlarynda peýda bolup biljekdigi baradaky habarlar bilen tanşandygymyzy aýdyp bilýäris.
Häzirki wagtda «Karib deňziniň garakçylary 6» filmi barada resmi bildiriş berilenok.  Ýöne şu maglumatlardan çen tutsaň hem, studiýanyň bu taslamany durmuşa geçirmäge çynlakaý girişendigini bilip bolýar.