Dünýäniň iň meşhur ýutubçysy Jimmi "MrBeast" Donaldsonyň eýeçiligindäki Beast Industries kompaniýasy ýetginjeklere we ýaşlara hyzmat edýän Step bank goşundysyny satyn alandygyny resmi taýdan yglan etdi.
Bu ylalaşyk Donaldsonyň şahsy maliýe serişdelerine we maýa goýumlaryna bagyşlanan täze YouTube kanalyny açmagynyň yzýanyndan baglaşyldy. Ýatladyp geçsek, 466 milliondan gowrak abunaçysy bolan MrBeast, öz wideolarynda adamlara uly möçberde pul sowgatlaryny paýlamagy bilen meşhurdyr.
MrBeast-iň biznes imperiýasy giňeýär. Onuň eýeçiliginde şeýle hem restoranlar tory we Feastables süýjülik brendi, ýakyn wagtda işe başlamagyna garaşylýan Beast Mobile operatory bar.
Step goşundysynyň satyn alynmagy bilen, ýutubçy maliýe hyzmatlary bazaryna ilkinji gezek gadam basdy.
Step — bu Monzo ýa-da Revolut ýaly mobil bank ulgamy bolup, ol ýörite ýetginjekler üçin uýgunlaşdyrylandyr. MrBeast-iň bu platformany saýlamagynyň esasy sebäbi — onuň auditoriýasynyň agraba böleginiň Z we Alfa nesillerinden ybarat bolmagydyr.
Gyzykly tarapy, Step goşundysynyň maýadarlarynyň arasynda Z nesliniň beýleki ýyldyzlary — Joş Riçards we Çarli D'Amelio ýaly meşhur tiktokerler hem bar.
