Paramount Pictures kinostudiýasy "Çirkin ses 7" (Крик 7) gorkuly filminiň täze tizer-treýlerini hödürledi. Wideorolik ilki Superboul oýny wagtynda görkezildi, soňra bolsa YouTube platformasynda köpçülige ýaýradyldy.
Meşhur sleşer-franşizasynyň ýedinji bölüminde biz ýene-de köne tanyşlarymyz — Niw Kempbell, Kortni Koks we Dewid Arketti göreris. Taslama "Çirkin ses" filminiň ilkinji ssenariçisi Kewin Uilýamson hem dolanyp geldi. Ol bu gezek diňe bir ssenariniň awtory däl, eýsem filmiň režissýory hökmünde-de çykyş edýär.
Wakalaryň merkezinde ýene-de 1996-njy ýyldaky original filmiň baş gahrymany Sidni Preskott durar. Ýatladyp geçsek, Niw Kempbell studiýa bilen maddy meselelerde ylalaşyp bilmändigi sebäpli, filmiň altynjy bölegine gatnaşmandy.
"Çirkin ses 7-niň" taýýarlyk döwri birnäçe galmagallar bilen utgaşdy: 2023-nji ýylyň noýabrynda studiýa syýasy garaýyşlary sebäpli Melissa Barrera bilen hyzmatdaşlygy bes etdi. Şondan bir gün soň, meşhur aktrisa Jenna Ortega iş grafiginiň gabat gelmeýändigi sebäpli taslamadan gidýändigini mälim etdi. Soňra bolsa režissýor Kristofer Lendon hem taslamany terk etdi.
"Çirkin ses 7" filminiň dünýä prokatyna çykjak wagty 2026-njy ýylyň 27-nji fewralyna meýilleşdirildi.
