11-nji fewralda ulaglaryň hereket tertibi üýtgediler we janköýerlere ýeňillik dörediler

Türkmenistanyň paýtagtynda «Arkadag» we «Al-Nasr» futbol toparlarynyň arasyndaky duşuşyga taýýarlyk işleri tamamlanýar. Tomaşaçylaryň howpsuzlygyny we oňaýlylygyny üpjün etmek maksady bilen, 11-nji fewralda Aşgabatda ulaglaryň hereketine we jemgyýetçilik pudagynyň işine aýratyn tertip girizilýär.  
Ulaglar üçin sagat 15:00-dan başlap, şäheriň Saparmyrat Türkmenbaşy şaýoly, 10 ýyl Abadançylyk şaýoly, Atatürk köçesi, Oguzhan köçesi ýaly esasy köçelerinde hereket wagtlaýyn çäklendiriler. 
Janköýerler üçin bolsa Ankara köçesiniň ugrunda ýerleşýän awtoduralgalardan iki sany wagtlaýyn awtobus gatnawy ýola goýlar. Awtobuslar stadiona çenli 2–3 minutlyk gysga wagt aralygy bilen gatnar.
«Olimpiýa» stadionyna giriş dört sany ýöriteleşdirilen gapy arkaly guralar. Olaryň üçüsi Saparmyrat Türkmenbaşy şaýoly tarapyndan, birisi 10 ýyl Abadançylyk şaýoly tarapyndan amala aşyrylar. 
Çäräniň dabaraly bölegi sagat 17:00-da türkmen estrada ýyldyzlarynyň gatnaşmagyndaky konsert bilen başlanar. Janköýerlere barlag nokatlaryndan wagtynda geçmek we ýerlerini eýelemek üçin stadiona öňünden gelmek maslahat berilýär.