Ýanwar aýynda Microsoft kompaniýasy Windows 11 üçin täzelenme çykardy. Bu täzelenme bilen printerleriň könelen V3 we V4 wersiýaly draýwerleriniň goldawy bes edildi. Täzelenme tapgyrma-tapgyr ýaýradylýar we wagtyň geçmegi bilen ähli goldanylýan kompýuterlere gurlar.
Kompaniýanyň resmi goldaw sahypasynda bellenilişi ýaly, 2026-njy ýylyň ýanwaryndan başlap, Windows indi bu wersiýaly draýwerler bilen işlemez. Şeýle draýwerler eýýäm 2023-nji ýylyň sentýabrynda könelen diýlip ykrar edilipdi, şondan soň hyzmatdaşlara we ulanyjylara üýtgeşmelere taýýarlanmak üçin wagt berlipdi.
Microsoft köne draýwerlerden ýüz öwürmegiň ulanyjylaryň köpüsine täsir etmejekdigini belleýär. Bazardaky printerleriň agramly bölegi eýýäm draýwerleriň has döwrebap arhitekturasyny ulanýarlar we olar hiç hili çäklendirmesiz işlemegini dowam ederler.
Şol bir wagtyň özünde, häli-şindi köne printer modellerini ulanýan edara-kärhanalarda kynçylyklaryň ýüze çykmagy mümkin. Şeýle tehnika köplenç könelen kompýuterler bilen bilelikde ulanylýar, ýöne elmydama beýle däl. Köne printer döwrebap Windows 11 ulgamly kompýutere birikdirilen ýagdaýynda, täzelenme gurnalandan soň çap etmek bilen bagly meseleler ýüze çykyp biler.
