Tailandda parlament saýlawlary we Konstitusiýa boýunça ses berilişik tamamlandy

Tailandda geçirilen parlament saýlawlarynda premýer-ministriň wezipesini wagtlaýyn ýerine ýetiriji Anutin Çarnwirakul tarapyndan ýolbaşçylyk edilýän «Tailandyň buýsanjy» (Bhumjaithai) konserwatiw partiýasy ýeňiş gazandy. Onuň bäsdeşi bolan progressiw Halk partiýasy ýeňlendigini boýun aldy diýip, Bangkok Post neşiri habar berýär.
Deslapky maglumatlara görä, «Tailandyň buýsanjy» parlamentiň aşaky palatasyndaky 500 orundan takmynan 200-sini eýeleýär. Halk partiýasyna bolsa 100 töweregi mandat düşýär. Üçünji ýeri bolsa 70-e golaý orun alan liberal «Tailand üçin» partiýasy eýeledi. Bu partiýa hökümeti düzmek üçin zerur bolan koalisiýany döretmekde «Tailandyň buýsanjy» partiýasynyň ähtimal hyzmatdaşy hökmünde-de görülýär.
«Biz bu ýeňşi halkyň partiýanyň ýurduň durnukly ösüşine goşant goşjakdygyna we adamlary biynjalyk edýän meseleleri çözjekdigine bolan ynamyň nyşany hökmünde görýäris. Biz halkyň islegine doly düşündik» diýip, Anutin Çarnwirakul öz garaýşyny mälim etdi.
Düýn, ýagny 8-nji fewralda saýlawlar bilen bir wagtda Konstitusiýa üýtgeşmeler girizmek boýunça ses berilişik hem geçirildi. Deslapky maglumatlara görä, ses bermäge gatnaşanlaryň takmynan 60%-i konstitusion üýtgeşmeleri goldady.