Apple kompaniýasy Ýaponiýanyň bazarynda iPhone 17 smartfonlar hatarynyň satuw modelini üýtgetdi. 2026-njy ýylyň 6-njy fewralyndan başlap, Ýaponiýadaky resmi Apple Store dükanlary iPhone 17, iPhone 17 Pro we iPhone 17 Pro Max modelleriniň göni satuwyny bes etdi.
Indi bu enjamlary diňe onlaýn arkaly — Apple-iň sahypasyndan ýa-da resmi goşundysyndan satyn alyp bolýar. Şunda smartfonyň belli bir dükanda bar bolmagynyň ähmiýeti ýok. Sargyt resmileşdirilip, tölegi geçirilenden soň, alyjy harydy Apple Store-dan özüniň alyp gitmegini ýa-da eltip beriji arkaly eltilmegini saýlap biler.
Apple-iň adaty dükanlary indi sargytlary gowşuryş nokady wezipesini ýerine ýetirýärler. Kompaniýanyň goldaw gullugy munuň wagtlaýyn karar ýa-da aýry-aýry nokatlardaky synag däldigini, eýsem tutuş iPhone 17 hataryna degişli bolan täze syýasatydygyny tassyklady.
Apple-iň beýleki önümlerine bu düzgün degişli däl. Öňki nesliň smartfonlary bolan iPhone 16-ny heniz hem adaty usulda, gönüden-göni dükanlardan satyn alyp bolýar.
Apple satuw shemasynyň üýtgemeginiň resmi sebäplerini aýan etmän, diňe «töleg usullaryndaky üýtgeşmeler» diýen sözler bilen çäklenýär. Şol bir wagtyň özünde, bu kararyň alyp satarlara garşy göreş we sebitdäki maliýe amallaryny optimallaşdyrmak bilen bagly bolmagy ähtimal.
