Apple duýdurýar: anonim çatlar App Store-den duýduryşsyz öçüriler

Apple kompaniýasy ykjam goşundylaryny barlamak kadalaryny täzeledi we anonim ýazyşma häsiýetli hem-de «çat-ruletka» görnüşli hyzmatlary AppStore dükanynda ýerleşdirmegi gadagan etdi. Bu barada 9to5Mac portaly ýazýar.
Üýtgeşmeler programmalary barlamak boýunça gollanmanyň (App Review Guidelines) 1.2-nji bölümine girizildi. Indi kadalarda şeýle programmalaryň platformanyň talaplaryna laýyk gelmeýändigi we olaryň işläp düzüjilere öňünden duýdurylmazdan öçürilip bilinjekdigi-de gönümel görkezilýär.
Mundan ozal duýduryşsyz öçürilip bilinjek hyzmatlaryň sanawyna edepsiz mazmunly, fiziki haýbat äheňli ýa-da adamlary kemsidiji (meselem, daşky görnüşine görä ses bermek ýaly) programmalar girýärdi. Täzelenen nusgada bu sanawa gatnaşyjylaryň anonim görnüşde gürleşýän ýa-da biri-biri bilen tötänleýin usulda birikdirilýän programmalary hem goşuldy. Apple şeýle formatlaryň töwekgelçilikleri, şol sanda awtorlyk hukuklarynyň bozulmak mümkinçiligini döredýändigini belleýär.
Ekspertler bu üýtgeşmeleri goragsyz ulanyjylar üçin abanýan howplary azaltmak tagallalary bilen baglanyşdyrsalar-da, Apple-iň resmi beýanatynda çagalaryň we ýetginjekleriň goragy hakda aýratyn bir zat agzalmaýar. Mundan ozal, Awstraliýanyň «eSafety Commissioner» düzgünleşdiriji edarasynyň anonim ýazyşmalaryň howpy baradaky hasabatyndan soň, Apple we Google kompaniýalary «OmeTV» programmasyny öçüripdiler.
Mazmuny ulanyjylaryň özleri tarapyndan döredilýän, kemsidiji hereketlerden şikaýat etmek üçin gurallary ulanmak we islenilmeýän mazmuny filtrlemek ýaly beýleki programmalar üçin hökmany talaplar öňküligine galar. Täze girizilen kadalar Apple kompaniýasyna düzgün bozmalara çalt seslenmek üçin hukuk esaslaryny berýär.