Wenesiýada 9 günüň dowamynda 15 gezek ýokary suw joşguny hasaba alyndy. Bu ýylyň başy üçin rekord görkezijidir diýip, ANSA agentligi habar berýär.
Suw joşgunlaryna gözegçilik ediş merkeziniň direktory Alwize Papa bu ýagdaýy «heniz görlüp-eşidilmedik waka» diýip atlandyrdy we muny global maýlama sebäpli ýüze çykýan töwekgelçilikleriň artmagy bilen baglanyşdyrdy. Onuň aýtmagyna görä, rekorduň esasy sebäbi — deňiz derejesiniň ortaça derejeden ýokarlanmagydyr.
Bolup geçen 15 suw joşgunynyň 10-sy 110 santimetr derejesinden ýokary geçdi. Şäher häkimiýetleri suw basmagynyň öňüni almak üçin, şeýle ýagdaýlara niýetlenen MOSE bentler ulgamyny on gezek ulanmaga mejbur boldular.
«Öňler suwuň derejesini 80 santimetr ýokarlandyrmak üçin örän güýçli ýeller gerek bolýan bolsa, indi deňiz derejesiniň bir metre ýetmegi üçin has pes öwüsginli ýeller hem ýeterlik» diýip, gözegçilik merkeziniň direktory ýagdaýyň düýp sebäbini düşündirýär.
Hünärmenler hatda adatdan daşary howa şertleri bolmadyk ýagdaýynda-da, Wenesiýanyň barha ýygy-ýygydan suw astynda galmak howpy bilen ýüzbe-ýüz bolýandygyny belleýärler. Şeýle şertlerde, suwy bir metrden pes derejede saklaýan MOSE ulgamynyň durnukly işlemegi şäheri gorap saklamakda esasy faktor bolup durýar.
Milliardlarça ýewro düşen MOSE ulgamy, tas on ýyllyk gijikdirilme bilen 2020-nji ýylda ulanmaga berildi. Şol ýylyň oktýabr aýynda ol ilkinji gezek Wenesiýany ygtybarly gorapdy. Emma dekabr aýynyň başynda bolup geçen howa çaklamasyndaky ýalňyşlyk we suw gatlalarynyň (şlýuzlaryň) wagtynda ýapylmazlygy şäheri ýene-de suw joşgunyna sezewar etdi.
