Tramp dermanlary arzan tapmaga kömek edýän TrumpRx saýtyny işe girizdi

ABŞ-nyň Prezidenti Donald Tramp amerikanlara lukmanlaryň görkezmesi boýunça satyn alyp bolýan dermanlary arzan bahadan tapmaga kömek etjek TrumpRx saýtynyň işe girizilendigini habar berdi.
TrumpRx — bu dermanlary gönüden-göni satmaýan hökümet web-saýtydyr. Ol araçy hökmünde işläp, ulanyjylary dermanlary göni sarp edijilere satýan farmasewtik kompaniýalaryň saýtlaryna ugrukdyrýar. Şeýle hem platformada dermanhanalarda ulanyp boljak kuponlar elýeterlidir. PBS neşiriniň habar bermegine görä, saýt işe girizilen pursatynda onda dermanlaryň 40-dan gowrak görnüşi, şol sanda agramy azaltmak üçin niýetlenen «Ozempik» we «Wegowi» ýaly derman serişdeleri bardy.
«Şu agşam biz saglygy goraýyş ulgamynda taryhda iň giň gerimli başlangyçlaryň biriniň durmuşa geçirilýändigini bellemek üçin ýygnandyk. Ozal beýle zat hiç wagt bolmandy. Şu agşamdan başlap, iň köp ulanylýan we görkezme boýunça satylýan dermanlaryň onlarçasy ähli sarp edijiler üçin uly arzanladyşlar bilen elýeterli bolar» – diýip, Tramp mälim etdi.
Prezidentiň aýtmagyna görä, bahalaryň arzanlamagy onuň administrasiýasynyň derman kompaniýalaryna eden basyşynyň netijesi boldy. Tramp ABŞ-da we beýleki ýurtlarda dermanlar üçin birmeňzeş bahalaryň goýulmagyny talap edendigini, munuň bolsa daşary ýurtlarda dermanlaryň gymmatlamagyna getirjekdigini belledi.
«Biz öz hasabymyza bütin dünýä üçin ýeňillik döretmekden ýadadyk» – diýip, ol nygtady.
Demokratlar bolsa, öz gezeginde, ozalky prezident Jo Baýdeniň döwründe kabul edilen Inflýasiýany peseltmek hakyndaky kanun esasynda başlanan «Medicare» maksatnamasynyň çäklerinde bahalar boýunça gepleşikleri giňeltmegi has netijeli hasaplaýar.
ABŞ derman bazarynyň iň gymmat bolan ýurtlarynyň biri hökmünde galýar, Ýewropada we Aziýada bolsa bahalary kadalaşdyrmagyň has berk mehanizmleri hereket edýär.